‘S’kemi prioritet hyrjen në qeveri’, Kamberi flet pas konsultimeve me Vuçiç

Shaip Kamberi deklaroi se prioritet i “Koalicionit të Shqiptarëve të Luginës” nuk është hyrja në qeverinë e Serbisë, por integrimi i tyre.

Deklaratën, Kanberi, i cili është përfaqësues i këtij koalicioni, e dha pas përfundimit të takimit me presidentin serb Aleksandër Vuçiç ku zhvilluan konsultime për qeverinë e re, shkruan Danas.

Kamberi u shpreh se Vuçiç nuk ka ofruar asgjë konkrete, por vetëm ka dëgjuar kërkesat shqiptare që datojnë nga viti 2013.

“Ne i kërkuam presidentit që personalisht të zbatojë përmbushjen e atij plani. Do të shohim se çfarë do të ndodhë. Me ardhjen këtu, kemi dashur të tregojmë konstruktivitet në zgjidhjen e problemeve me të cilat ballafaqohen shqiptarët”, tha Kamberi teksa shtoi se ai ka marrë pjesë në zgjedhje që nga viti 2010, por nuk ka qenë asnjëherë pjesë e qeverisë.

Zgjedhjet e përgjithshme në Serbi u mbajtën me 3 Prill, por për shkak te përsëritjes 5 here të zgjedhjeve në Luginën e Preshevës, nuk u bë i mundur certifikimi i tyre që do t’i hapte rrugën krijimit të qeverise së re.