FOTO | Punonjësit e transportit publik protestojnë sërish, shoqërohen në polici disa prej tyre

Punonjës të transportit urban kanë protestuar sërish ditën e sotme para Ministrisë së Infrastrukturës dhe Energjisë, ku kërkuan një ‘pagë lufte’ shtesë dhe përmbushjen e kërkesave të tyre me qëllim rinisjen e punës.

Policia ka shoqëruar disa nga protestuesit, ndërsa ka tentuar të shpërndajë disa herë pjesëmarrësit duke iu bërë me dije faktin se për shkak të gjendjes së pandemisë tubimet nuk janë të lejuara.

Një ditë më parë, në një intervistë për Euronews Albania, përfaqësues i unionit të operatorëve të transportit publik, Dashnor Memaj e cilësoi protokollin e caktuar nga Ministria e Shëndetësisë për funksionimin e transportit publik si shumë të ashpër.

“Jemi i vetmi subjekt që vijojmë të jemi të mbyllur. Ministrja e ka bërë mbylljen me urdhër dhe me urdhër duhet të bëhet dhe hapja, dhe jo me Facebook. Numri i udhëtarëve është 70% e kapacitet dhe ulja të jetë në mënyrë diagonale.

Përgjegjësia te protokolli është e jashtëzakonshme pasi me 2-3 shkelje shkon për ndjekje penale administratori. T’i hiqet përgjegjësia subjektit dhe t’i lihet qytetarëve. Ka pika të protokollit që bien ndesh me njëra-tjetrën. Kërkohet dezinfektim por kjo ka një kosto”, tha ai.