Gjykata lë në burg 26-vjeçaren e dyshuar se nxori në pritë Hekuran Billën, e reja mohon akuzat

Gjykata e Tiranës ka dhënë masën e sigurisë arrest me burg për 26-vjeçaren Adjola Lakra, e arrestuar disa ditë më parë nën dyshimin si bashkëpunëtore në vrasjen e Hekuran Billës.

Para Gjykatës, 26-vjeçarja ka mohuar akuzat e ngritura ndaj saj, duke mos pranuar se ka qenë bashkëpunëtore në krimin e ndodhur disa ditë më parë në zonën e Komunës së Parisit, ku mbeti i vrarë 40-vjeçari Billa.

Në një komunikim për mediat në përfundim të seancës, avokati mbrojtës Andi Duro mohoi akuzat ndaj klientes së saj, ndërsa tha se e vetmja arsye pse ajo u la në burg është për shkak të helmimit që i është bërë opinionit publik.

Ai pranoi se klientja e tij kishte njohje me viktimën dhe një nga personat e dyshuar si autor i vrasjes, por mohoi se ajo kishte dijeni për konfliktin mes tyre.

26-vjeçarja sipas Prokurorisë dyshohet se ka nxjerrë në pritë Billën dhe dyshohet se ka bashkëpunuar me dy persona e tjerë të arrestuar, Sebastian Mali dhe Viktor Marku.

Hekuran Billa u ekzekutua në makinën e tij dhe motiv i krimit është hakmarrja. Billa në 2006 në Angli ka vrarë vëllain e Viktor Markut.

Ai u dënua me burgim të përjetshëm nga gjykata angleze. Por pas ardhjes në Shqipëri Gjykata e Tiranës ndryshoi vendimin dhe e dënoi me 25 vite burg. Ai u lirua në shkurt të 2019 pas disa uljeve që përfitoi nga Gjykata e Krujës.