‘S’janë fermerë, por hajdutë’, reagon kreu i Bashkisë së Vaut të Dejës

Kryetari i Bashkisë Vau Dejës Mark Babani ka reaguar një ditë pas padisë në Prokurorinë e Shkodrës nga fermerët për abuzime në ndarjen e subvencioneve të naftës.

Në fjalën e tij Babani hodhi poshtë akuzat duke theksuar se administrata e bashkisë nuk ka asnjë tagër vendimarrës në këtë proces.

Ai akuzoi se personat qe janë ngritur në protestë nuk janë fermerë.

“Nuk ka lidhje me bashkinë. Nuk është një pjesë e fermerëve, bashkia nuk ka lidhje me këtë pjesë. Kjo vjen si rezultat i shumë sulmeve janë bërë në këtë bashki që në 2019, që me djegien e votave. Nuk janë fermerë këta, janë hajdutë. Një nga ata ka qenë topograf i bashkisë dhe është dënuar me 5 vite për të mos qenë në administratë”, u shpreh ai.

Një ditë më parë, fermerët e Vaut të Dejës depozituan padi në prokurori kundër drejtueses së AZHBR-së Eranda Selmanaj dhe kreut të bashkisë Mark Babani për ndarje abuzive të subvencioneve të naftës.

Pritet nisja e hetimit për rastin në fjalë ku me dhjetëra fermerë pretendojnë se shpërndarja e fondeve është kryer në mënyrë arbitrare. Fermerët pretendojnë se rritja e çmimit të karburantit dhe të plehra kimike rrezikon t’i çojë drejt falimentimit.

35 milionë euro fonde të buxhetuara për skemat e mbështetjes në bujqësi janë ezauruar që në gjysmën e parë të vitit.

LEXONI GJITHASHTU:

• Fermerët e Shkodrës padisin Agjencinë e Bujqësisë, kërkojnë subvencionet