30 grupe të rinjsh marrin pjesë në festivalin e këngës labe në Vlorë

Çel siparin edicioni i parë i festivalit të këngës labe në Vlorë. “Polifonia shpirti i Labërisë” mblodhi 30 grupe të rinjsh nga të gjithë fshatrat e labërisë.

Dikush të trashëguar nga familja, dikush i apasionuar pas traditës, këngëtarët shprehin emocionet e tyre.

Për regjisorin e mirënjohur vlonjat, Guri Gjeçi, i kthyer në skenë pas 19 vitesh në Amerikë, rikthimi në një festival të tillë është një kënaqësi por edhe detyrim ndaj traditës.

“Padyshim që është një emocion shumë i madh, është një kënaqësi shumë e madhe sepse unë me folkun shqiptar dhe mbi të gjitha me folkun vlonjat u rrita, u bëra artist,” – u shpreh Gjeçi.

Zv. ministrja e turizmit Vilma Bella tha për Euronews Albania se aktivitete të tilla në mes të sezonit veror, janë një vlerë e shtuar në funksion të trashëgimisë kulturore dhe turizmit.

Organizatori dhe ideuesi, deputeti i Lumit të Vlorës, Vullnet Sinaj tha se ky festival duhet të kthehet në një takim të përvitshëm me tabanin dhe traditën e patjetërsueshnme të Labërisë.

Nata e parë e Festivalit të Këngës Labe është ndjekur nga spektatorë të shumtë artdashës të këtij zhanri.

Për dy netë me rradhë Lungomare këndon labçe. Festivali pritet të kthehet në një takim të përvitshëm të gjithë zonave të labërisë.

LEXONI GJITHASHTU:

• Netët e “Bejkës së Bardhë”, festivali folklorik mbi polifoninë labe