Meta e Ruçi urojnë Gjermaninë për presidencën e BE-së, garantojnë se do punojnë për përmbushjen e kushteve të Bundestagut

Presidenti Ilir Meta dhe kryetari i Kuvendit Gramoz Ruçi mirëpritën të mërkurën marrjen e presidencës së radhës në Bashkimin Evropian nga Gjermania.

Dy zyrtarët e lartë të shtetit shqiptar shprehën besimin se nën ndikimin e politikës gjermane Evropa do të marrë një perspektivë pozitive drejt riorganizimit për përballimin e pandemisë së COVID-19, përballjes me krizën ekonomike, por edhe për çështjen e zgjerimit.

Përmes një postimi në Facebook, Meta u shpreh mirënjohës për ndikimin e politikës gjermane në vendosjen e Shqipërisë në krye të agjendës së integrimit.

Meta kujtoi se Shqipëria duhet të përmbushë dhe zbatojë kërkesat e vendosura nga Bundestagu gjerman pasi “kjo është mundësi që nuk duhet humbur kurrsesi!”.

Të martën Meta takoi kryeparlamentarin Ruçi, me të cilin bashkërendoi nisjen e punës për përshpejtimin e procesit të emërimeve në drejtësi, proces i kërkuar nga Bundestagu.

“Shpresoj që kjo të frymëzojë një qasje të ngjashme gjithëpërfshirëse në të gjitha fushat ku nevojiten reforma kyçe. Pritshmëritë për nisjen e negociatave të anëtarësimit gjatë presidencës gjermane janë të larta,” – u shpreh Meta.

Ndërkohë kryeparlamentari Ruçi i drejtoi një urim homologut të tij gjerman Wolfgang Schäuble, të cilit i shprehu falënderim për mbështetjen e dhënë Shqipërisë.

“Bashkimi Europian po përballet me një recesion të thellë. Por Shqipëria ka besim të plotë se plani i Gjermanisë për rimëkëmbjen ekonomike të vendit dhe të Europës, për të përballuar dhe kapërcyer pasojat e pandemisë së koronavirusit, do të jetë një mbështetje e madhe për të gjithë kontinentin, përfshirë vendet e Ballkanit Perëndimor,” – u shpreh kryeparlamentari Ruçi teksa theksoi se Kuvendi dhe Presidenti “po punojnë me përgjegjësi për të zbatuar rekomandimet e Këshillit Evropian dhe Bundestagut.

Presidenca e Këshillit të BE-së kryeson takimet në çdo nivel në Këshill, koordinon si dhe drejton vazhdimësinë e punës së Këshillit. Çdo 6 muaj Presidenca i kalon në rotacion një prej vendeve anëtare të BE-së.

Lexoni gjithashtu:

Gjermania merr sot presidencën e radhës së BE-së