Basha e Meta përkujtojnë 30-vjetorin e mësymjes në ambasada: Koha të përmbushim ëndrrën, Shqipëria si Evropa

Presidenti Ilir Meta dhe kryetari i Partisë Demokratike Lulzim Basha kujtuan të enjten ngjarjet e 2 korrikut 1990 kur rreth 3,200 shqiptarë mësynë Ambasadën gjermane në Tiranë për “një jetë të re në liri”.

“Hapja e dyerve të Ambasadës gjermane goditi në zemër diktaturën më të egër në Evropë,” – shkroi në Facebook Presidenti.

“30 vite më pas, në emër të këtyre sakrificave të jashtëzakonshme njerëzore duhet të përmbushim sa më parë të gjitha kushtet, që të nisim negociatat e anëtarësimit me BE gjatë Presidencës gjermane,” – tha Meta teksa rikujtoi se presidenca gjermane e BE-së është mundësi e shkëlqyer për Shqipërinë.

“Shumë të rinj sot, të lirë për të udhëtuar kudo në Europë, e kanë të vështirë të kuptojnë se çfarë ndodhi ato ditë të nxehta korriku në Tiranë. Të tjerë, në moshë më të madhe i kane ende të freskëta në kujtesë ngjarjet e Rrugës së Ambasadave, pasigurinë për të ardhmen e atyre që ishin brenda dyerve, padurimin për t’u larguar drejt perëndimit të ëndërruar, apo dyzimin dhe frikën e të tjerëve që shihnin nga larg se si regjimi po shkërmoqej,” – u shpreh kryetari i PD-së, Basha, i cili kujtoi se 10 vite më parë shqiptarët siguruan lëvizjen e lirë pa viza në Evropë.

Kryetari i PD-së bëri thirrje që 2 korriku 1990 “të jetë shtysë dhe frymëzim për realizimin e ëndrrës së shqiptarëve, për të rrëzuar çdo mur që mban larg Europës”.

Ngjashëm bëri thirrje dhe Meta, i cili u shpreh mirënjohës për shqiptarët që me guximin e tyre në vitin 1990 i dhanë Shqipërisë një drejtim të ri.

“Koha për të përmbushur ëndrrën e çdo qytetari: Shqipëria si gjithë Evropa! Koha për kthimin e shqiptarëve në vendin e tyre,” – theksoi Presidenti.

Pas ngjarjeve në Rumani dhe Gjermaninë Lindore gjatë vitit 1989, ku rrëzimi i murit të Berlinit dhe vrasja e Çausheskut i dhanë fund regjimeve komuniste atje, mijëra shqiptarë të trysnuar nga gjendja e vështirë ekonomike dhe politike që po kalonte vendi nën regjimin e Ramiz Alisë, mësynë ambasadat e vendeve perëndimore duke kërkuar largim nga vendi.

Ajo që në histori tashmë njihet si “eksodi” apo “ngjarja e ambasadave” kulmoi më 2 korrik 1990 kur nga ambasadat kryesore, ajo e Gjermanisë dhe Italisë pritën në mjediset e tyre pjesën dërrmuese të të rinjve që kapërcyen muret.

Zyrtarisht komunizmi në Shqipëri ra pas lejimit të pluralizmit disa muaj më vonë dhe kur grevat e protestat e studentëve nxitën demonstrata masive, të cilat çuan në rrëzimin e shtatores së diktatorit Enver Hoxha, rrëzuan qeverinë e asaj kohe dhe mbajtjen e zgjedhjeve.