Rinis transporti urban, përgjegjësia për zbatimin e masave personale jo e kompanive

Nga kjo e hënë qytetarët do kenë mundësi të lëvizin me autobus brenda qytetit, por duke respektuar një sërë masash higjieno-sanitare.

Vendimi për rinisjen e punës së transportit publik vjen pas katër muajsh të mbyllur prej COVID-19.

Protokolli detyron mbajtjen e maskës për udhëtarët që presin në stacionet e autobusit, për të gjithë udhëtarët gjatë udhëtimit si dhe për shoferët dhe fatorinot.

Nga ana tjetër çdo operator transporti duhet të vendosë postera informues për rregullat kundër covid-19 në autobus, i cili duhet të dezinfektohet periodikisht.

Ky protokoll erdhi si një dakordësi mes Kryetarit të Bashkisë Erion Veliaj dhe Shoqatës së Shoqërive të Transportit Publik, të cilët prej javësh protestuan për plotësimin e një sërë kërkesash para rinisjes së punës.

Në protokollin e ri bie në sy fakti se përgjegjësia për zbatimin e rregullores do të jetë personale dhe jo më përgjegjësi e kompanive të transportit.