Spanjë, një tjetër rajon rikthen karantinën

Galicia, rajoni veriperëdimor i Spanjës, ka vendosur kufizime për 70 mijë persona këtë të diel, një ditë pasi në Katalonja u bë e njëjta gjë.

Nga e hëna e 6 korrikut e deri të premten, datë 10, banorët nk do të lejohen të dalin nga zona e tyre. Ndërkohë, më 12 korrik, Galicia mbn zgjedhjet rajonale.

Në qytezën Foz, të La Marinas, rulotat e turistëve, të parkuara buzë detit, u larguan me të dëgjuar lajmin, për të mos u bllokuar.

Kryeministri spanjoll, Pedro Sançez u bëri thirrje banorëve të mos e ulin mbrojtjen nga COVID-19, por gjithashtu deklaroi se sistemi shëndetësor është më i përgatitur tani se në mars.

Ndërkohë, njerëzit brenda La Marinas do të lejohen të qarkullojnë vetëm për arsye pune.

Ministri rajonal i shëndetësisë, Jesus Vazquez Almuina tha në një konferencë për shtyp të dielën se përhapjet e reja të virusit kishin ndodhur për shkak të disa bareve në zonë. Nga 258 raste që ka pasur gjithsej Galisia, 117 ishin vetëm në qytezën e Lugos.

Autoritetet do të ulin kapacitetin e bareve me 50% dhe njerëzit do të detyrohen të mbajnë maska dhe në plazhe e pishina.