Berisha publikon denoncimin e qytetarit: Kam 5 ditë me shenja të COVID-19, askush nuk vjen të më bëjë tamponin

Ish-kryeministri Sali Berisha ka publikuar në faqen e  tij në Facebook një mesazh zanor të një qytetari që pretendon se prej 5 ditësh vuan me shenjat e COVID-19 dhe askush nuk ka shkuar t’i bëjë tamponin.

Në mesazhin zanor dëgjohet denoncuesi i cili thotë se jeton vetëm, dhe se ka lajmëruar të gjitha instancat, që nga 127 deri tek mjeku i familjes, por nuk e ka ndihmuar askush.

“Jam një pacient, kam 5 ditë që vuaj me shenjat e COVID-19, kam njoftuar gjithë shtetin, kam marrë 127, Ministrinë e Shëndetësisë, mjekun e familjes, s’vjen njëri të më bëjë tamponin. Jetoj vetëm, fati më ka dënuar të jetoj, jetoj në Tiranë, tek rruga ‘Jordan Misja’.

Të lutem më ndihmo, të mos kenë edhe të tjerët fatin tim, bëje pubkli këtë rast. Për mua shteti ka falimentuar”, dëgjohet në mesazhin zanor të bërë publik nga ish-kryeministri.

“Braktisje kriminale skandaloze e të sëmurit me COVID! Dëgjoni thirrjen e tij! Turpi! Krim!”, shkruan z. Berisha.

Numri i rasteve me COVID-19 në vendin tonë ka ardhur duke u rritur gjatë ditëve të fundit. Vetëm sot u regjistruan 74 raste të reja dhe 3 viktima, ndërkohë numri total i të infektuarve është 1,183 dhe numri i viktimave ka shkuar në 79.