Mjeku i Urgjencës: Qeveria nuk lejon tamponët tek spitalet private se fsheh numrin e vërtetë të të infektuarve

Mjeku i Urgjencës, Petrit Vargu tha për Euronews Albania se situata nga COVID-19 në Shqipëri nuk është menaxhuar siç duhet që nga fillimi i pandemisë, kur sipas tij masat u morën shumë vonë në një kohë që ne kishim fluks lëvizjesh me Italinë dhe veçanërisht pas daljes nga karantina kur asnjëherë s’u tha cilat ishin masat e brendshme për secilin institucion që do të hapej.

Por sipas mjekut Vargu, skandali më i madh është mosmenaxhimi i situatës së virusit në QSUT, duke e e kthyer atë vend në një vatër infeksioni për të gjithë vendin.

“Për të arritur në skandalin e vërtetë që ishin spitalet ku nga mosmarrja e masave, QSUT u kthye në në bombë për gjithë Shqipërinë.

Hapja tek ne u bë në mënyrë të rastësishme, ne u hapëm pse u hapën vendet rreth nesh, në mënyrë të pastudiuar prandaj ndodhi ajo që ndodhi.

Tani edhe qershia mbi tortë, u hap dhe transport urban kur jemi në maksimumin e fluksit”, tha mjeku.

I pyetur lidhur me shqetësimin e denoncuar së fundmi nga shumë qytetarë të cilëve nuk iu bëhet tamponi edhe pse kanë shenja klinike të virusit, mjeku kardiolog tha se kjo është pjesë e strategjisë së qeverisë për të fshehur shifrat e vërteta të të infektuarve me COVID-19.

Sipas tij, ky është një shërbim që mund të ofrohet shumë mirë edhe nga spitalet private, gjë që sipas qeveria s’e lejon për arsyen e mësipërme.

I pyetur lidhur me bonusin që kryeministri premtoi në fillim të pandemisë për mjekët që janë në frontin e parë me sëmundjen, mjeku Vargu e cilësoi edhe këtë një demagogji të pastër, pasi sipas tij këtë bonus që aktualisht e përfitojnë vetëm 10 mjekë të Infektivit, duhet ta përfitojnë të gjithë mjekët të cilët janë njësoj të rrezikuar çdo ditë nga sëmundja.

“Për nga sëmundshmëria dhe vdekshmëria në frontin e parë janë të gjithë mjekët. Vetëm 10 mjekë janë ata që e kanë përfituar. 

Duhet ta marrin të gjithë mjekët e tjerë shpërblimin, pasi të gjithë janë në frontin e parë të sëmundjes. Gjithë QSUT u kthye në një vatër infeksioni përveç Infektivit”, tha mjeku.