Serbët në Kosovë janë qytetarë të barabartë, thotë ministri Sveçla

Ministri i Punëve të Brendshme të Kosovës, Xhelal Sveçla deklaroi se serbët janë qytetarë të barabartë në vend dhe gëzojnë të njëjta të drejta si komunitetet e tjera.

Teksa zhvilloi një vizitë në veri, Sveçla u shpreh se është ministër i të gjithë qytetarëve të Kosovës.

“Unë jam Ministër i të gjithë qytetarëve të Kosovës. Qytetarët serb nuk janë palë e dorës së tretë. Ata janë banorë, qytetarë të barabartë sikurse të gjitha komunitetet tjera që jetojnë këtu dhe gëzojnë të njejtat të drejta. Duke pasur parasysh proceset e përbashkëta që na presin, përgjatë takimeve theksova rëndësinë e bashkëpunimit me institucionet tona në mënyrë që t’i kalojmë ato më lehtë”, shkruan Sveçla në rrjetet sociale.

Më 17 gusht, Sekretari i përgjithshëm i NATO-s, Jens Stoltenberg do të mbajë takime të ndara në Bruksel me kryeministrin kosovar, Albin Kurti dhe presidentin serb, Aleksandar Vuçiç.

Një ditë pas, më 18 gusht do të zhvillohet takimi i dy liderëve nën ndërmjetësimin e Bashkimit Evropian. Ky takim është thirrur pas rritjes së tensioneve në veri të Kosovës.

LEXONI GJITHASHTU

• ‘Kurti-Vuçiç do mbajnë përgjegjësi’, BE i kërkon Kosovës e Serbisë të ulin tonet
• Kurti: Serbia mund të na sulmojë, por ne jemi gati