“Ti Kryeministër, unë President”, Basha: Rama do pazar për zgjedhjet

Kryetari i Partisë Demokratike, Lulzim Basha e ka cilësuar prishje të marrëveshjes së 5 qershorit, miratimin e listave të hapura dhe ndalimin e koalicioneve para zgjedhore në Parlament. Z. Basha tha se, kryeministri është në panik dhe kërkon “pazar” politik për heqjen e koalicioneve për zgjedhjet e ardhshme dhe ndarjen e pushtetit.

“Me aktin e sotëm, Edi Rama ka hedhur në erë marrëveshjen. Rama thotë heqim koalicionet, ti Kryeministër, unë President. Kështu e shikon Edi Rama marrëveshjen si një pazar”, tha z. Basha, duke shtuar “Pazar kërkoi, por pazar nuk mori dhe nuk do të marrë kurrë”.

Sipas tij çdo ndryshim i rregullave të lojës për zgjedhjet e ardhshme është dhunim flagrant i marrëveshjes së arritur më 5 qershor. Z. Basha tha se, miratimin e marrëveshjes në Parlament po e kërkojnë dhe ndërkombëtarët pa bërë asnjë ndryshim tjetër një vit para zgjedhjeve.

“Nuk ka cirk që e ndal rotacionin politik. Angazhimi ynë është që ta sjellim me sa më pak kosto për vendin. I bëj thirrje që sa nuk është vonë të marrë të gjitha masat dhe të pranojë realitetin e pashmangshëm se askush nuk është i përjetshëm në pushtet. Të lejojë rotacionin me votë të lirë”, tha kreu i PD.

Kryeministri, Edi Rama deklaroi gjatë daljes së sotme për mediat se është i gatshëm ta bëjë z. Basha pjesë të fitores. “Është e qartë që unë nuk punoj që PS të humbi zgjedhje dhe të fitojë Lulzim Basha dhe PD. Patjetër që jam gati ta bëj Bashën pjesë të fitores, por nuk jam i gatshëm që të bëjmë gjithçka që të humbasim”, tha z. Rama.

Lexoni gjithashtu:

Kryeministri Rama: Do të mbështesim hapjen e listave, PD të ndalë kërcënimet