Transportuan me makinë 50 emigrantë të paligjshëm, në pranga 3 persona

Tre persona janë arrestuar nga policia për dhënie ndihmë shtetasve të huaj, për kalim të paligjshëm të kufijve.

Policia thotë se në kuadër të operacioni të koduar “Tranzit 50” u arrestuan shtetasit Muhedin Bajraktari, Donald Lleshi, Marin Gjoka për veprën penale “Ndihma për kalim të paligjshëm të kufijve”. Gjithashtu, u shpall në kërkim shtetasi D. Sh., 29 vjeç.

“Shërbimet e Seksionit për Hetimin e Trafiqeve të Paligjshme në DVP Tiranë, në bashkëpunim me Forcën e Posaçme Operacionale dhe Forcën e Posaçme “Shqiponja”, në fshatin Mëzez, në rrugën “7 Nëntori”, kanë konstatuar mjetet me drejtues shtetasit Marin Gjoka dhe Muhedin Bajraktari, brenda të cilëve ndodheshin 50 shtetas të huaj. Sipas verifikimeve të kryera ka rezultuar se shtetasit Muhedin Bajraktari, Donald Lleshi, Marin Gjoka dhe shtetasi D. Ll., në bashkëpunim me njëri-tjetrin, kundrejt përfitimeve monetare, do t’i transportonin 50 emigrantët e paligjshëm nga Tirana në drejtim të Kukësit, me qëllim kalimin e tyre në pikat kufitare, me destinacion final vendet e BE-së”, sqaron policia.

Në vijim të veprimeve u proceduan penalisht 50 emigrantët e paligjshëm, për veprën penale “Kalimi i paligjshëm i kufirit shtetëror”.

LEXONI GJITHASHTU:

• Qarkullonin me armë dhe municion luftarak, arrestohen tre persona
• Zbulohet parcela 2500 metra katrorë me kanabis në Spanjë, arrestohen dy shqiptarë