Rama kërkon ‘korrektim’ të marrëveshjes së 5 qershorit

Kryetari i Partisë Socialiste, Edi Rama ka kërkuar ndryshimin e marrëveshjes së 5 qershorit për reformimin e kodit zgjedhor.

Në mbledhjen e Këshillit Politik, e cila u zhvillua sot, Rama e ka cilësuar si “korrektim në kod” propozimin e tij “për të sanksionuar hapjen e listave”.

Burime për Euronews Albania bënë me dije se kryetari i PS-së ka kërkuar dakordësimin e opozitës në mënyrë që kjo të arrihet ndërsa ka mbrojtur idenë e rishqyrtimit të mënyrës se si mund të formohen edhe koalicionet parazgjedhore.

“Nuk ju pengon njeri të bëni aleancat tuaja, ne nuk ndryshojmë as sistem, as zona zgjedhore. E vetmja gjë është që po hapim listat. Edhe për hapjen e listave hajdeni ulemi nëse keni ndonjë mendim se si ta garantojmë kuotën gjinore sa më mirë,” – mësohet të jetë shprehur Rama në mbledhje.

“Nuk ndalojmë koalicione, por forume grupimi që të mundësojë hapjen e listave dhe të mos ndërlikojë administrimin.  Pra koalicione siç i bën gjithë Evropa dhe jo si modeli ynë i deritanishëm që s’e ka askush,” – citohet të ketë thënë kryetari i PS-së në mbrojtje të propozimit fillestar për të sanskionuar në Kuvend heqjen e koalicioneve.

Më herët, sikurse është bërë me dije nga Euronews Albania, PD-ja ka shprehur shqetësimin pikërisht për kërkesën e mundshme nga socialistët për rishikimin e marrëveshjes së 5 qershorit.

Ajo dhe grupimi i opozitës jashtëparlamentare kanë qenë kategorikë për të mos hyrë në diskutime që rikthejnë tema të dakordësuara më parë.

Lexoni gjithashtu:

Euronews Albania zbardh qëndrimin e PD-së në mbledhjen e Këshillit Politik

Nisma për ndryshime kushtetuese trazon klimën politike në Shqipëri

Sistemi zgjedhor, ndryshimet kushtetuese që kërkojnë socialistët dhe opozita parlamentare

Afrim Krasniqi: Ndërkombëtarët kundër, bëhen në devijim nga praktikat demokratike

Endri Shabani: Lista gjysmë e hapur nuk është listë e hapur, t’i jepet fund kësaj talljeje dhe të lejohet gara në zgjedhje