Shtyrja e reformës zgjedhore, Muça: Berishës dhe Metës s’u leverdis të ulen me Ramën

Gazetari Flogert Muça thotë se situata politike në vend është e polarizuar dhe se kryedemokratit Sali Berisha dhe kreut të Partisë së Lirisë, Ilir Meta nuk u leverdis që të ulen me kryeministrin Edi Rama për të diskutuar për reformën zgjedhore.

Në një intervistë për “Euronews Albania”, Muça u shpreh se komisioni i ri hetimor për reformën zgjedhore, do të përdoret politikisht nga të dyja kampet politike.

“Kemi një situatë politike më të polarizuar se kurrë më parë. Opozitës dhe kur them për Partinë Demokratike të Sali Berishës dhe Partinë e Lirisë, nuk i leverdis dhe nuk është në agjendën e tyre që të ulen me Edi Ramën.

Pra, të mendosh që Sali Berisha dhe Ilir Meta do shkojnë dhe do bëjnë demokraci konstruktive, debat konstruktiv në sallat e Kuvendit, për të bërë reforma zgjedhore, kjo është e pamundur. Siç janë përdorur të gjitha Komisionet Hetimore për të bërë politikë, edhe ky komision i ri do të përdoret për të bërë politikë.”, theksoi gazetari.

Komisioni i Reformës Zgjedhore e shtyu afatin e veprimtarisë së tij deri në 10 mars të vitit të 2023.

Vendimi u mor sot në Mbledhjen e Komisionit, gati 3 muaj pasi ishte miratuar nga Kuvendi, por puna mbeti në vendnumëro dhe gjatë verës u zhvillua vetëm një mbledhje.

LEXONI GJITHASHTU

• Reforma zgjedhore shtyhet me 6 muaj
• Reforma territoriale, ekspertët: Shqetësues punësimi i militantëve në bashki