Roli i SHBA në dialogun Kosovë-Serbi, Philip Reeker mirëpret dhe mbështet rifillimin e dialogut në Bruksel

Ndihmës sekretari amerikan i Shtetit për Evropën dhe Euro-Azinë, Philip Reeker, ka mirëpritur rifillimin e dialogut Kosovë-Serbi në Bruksel. Këto komente ai i ka bërë gjatë një tele-konference të enjten mbrëma.

I pyetur për rolin e Shteteve të Bashkuara të Amerikës në dialogun në ndërmjet dy vendeve Ballkanike, Reeker tha se i “vjen mirë që dialogu ka rifilluar” dhe se SHBA-të do ta mbështesin këtë proces.

Diplomati amerikan njoftoi se të premten do të takohet me të Emëruarin e Bashkimit Evropian për dialogun Kosovë-Serbi, Mirslav lajçak.

Ndërsa, shtoi se do të vazhdojnë komunikimet me BE-në dhe se ambasadat Amerikane në Prishtinë dhe Beograd mbeten në kontakt të ngushtë me qeveritë e të dyjave vendeve.

Lidhur me angazhimin e Richard Grenell, Reeker tha se i Emëruari Special i presidentit Trump për dialogun Kosovë-Serbi ka punuar në aspektin ekonomik dhe gjetjen e mënyrave për përmirësimin jetës së qytetarëve në të dyja vendet.