Kaos në portin e Vlorës, qytetarët: Po digjemi në diell, kemi tre orë që presim

Radhë të gjata njerëzish janë krijuar në Portin e Vlorës për shkak se është sulmuar sistemi TIMS prej disa orësh.

Për mikrofonin e Euronews Albania, qytetarët shprehin se po presin që prej disa orësh, ndërkohë që nuk kanë asnjë informacion se kur do nisen për të arritur në destinacionet e tyre.

“Kemi afërsisht tre orë që presim, po presim biletat e tragetit. Këtej policia vazhdon punën por ata të tragetit po vonohen. Sportelet  vonojnë. “- tha një qytetar.

“Kam tre orë e gjysmë që po presim. Nuk na kanë lajmëruar për asgjë. Po vete ora 1:30, kemi ardhur që në orën 9. Na thonë s’ka sistemi, po ne po digjemi në diell. Nuk dimë asgjë. Kishim për t’u nisur në 1:30. “- u shpreh një tjetër.

Kryeministri Edi Rama ka njoftuar mëngjesin e së shtunës se hakerat iranianë kanë sulmuar sistemin TIMS.

Nëpërmjet një postimi në Twitter, kreu i qeverisë shqiptare nënvizon se po punohet pa orar me aleatët për t’i bërë të papenetrueshme sistemet tona digjitale.

Ky nuk është sulmi i parë i Iranit ndaj Shqipërisë. Pak javë më parë u sulmuan sistemet qeveritare. Për këtë arsye Shqipëria ka ndërprerë marrëdhëniet me shtetin e Iranit.

LEXONI GJITHASHTU:

• Floida Kërpaçi: Siguria kombëtare e Shqipërisë është shumë e cenuar
• Sistemi TIMS jashtë funksionit, në Kakavijë dhe Kapshticë po punohet me regjistra
• Çfarë ndodhë nëse sistemi TIMS nuk funksionon?