Pas TIMS, sulmohet dhe faqja e Policisë së Shtetit, reagon Ministria e Brendshme

Ministria e Brendshme ka reaguar për sulmin kibernetik ndaj sistemit TIMS dhe ndaj sistemeve të ruajtjes dhe transmetimit të të dhënave në Policinë e Shtetit.

Sipas ministrisë, nga të dhënat paraprake rezulton që sulmi të jetë kryer nga e njëjta dorë, pra nga Irani.

“Ekspertët tanë bashkë me ata të vendeve tona partnere kanë punuar intensivisht prej momentit të parë kur është detektuar sulmi, për të garantuar së pari pacënueshmërinë e të dhënave dhe më pas neutralizimin e këtij akti kriminal. Për efekt sigurie sistemet tona, përfshi atë TIMS, kanë qëndruar përkohësisht të mbyllura derisa rreziku të shmangej plotësisht. “- shkruan Ministria

Ministria bën me dije se shumë shpejt sistemi TIMS do të rikthehet në punë.

Kryeministri Edi Rama ka njoftuar mëngjesin e së shtunës se hakerat iranianë kanë sulmuar sistemin TIMS.

Nëpërmjet një postimi në Twitter, kreu i qeverisë shqiptare nënvizon se po punohet pa orar me aleatët për t’i bërë të papenetrueshme sistemet tona digjitale.

Ky nuk është sulmi i parë i Iranit ndaj Shqipërisë. Pak javë më parë u sulmuan sistemet qeveritare. Për këtë arsye Shqipëria ka ndërprerë marrëdhëniet me shtetin e Iranit.

Ndërkohë trupa diplomatike dhe stafi i ambasadës janë larguar nga vendi.

LEXONI GJITHASHTU: 

• FOTO/ Çfarë del në sistemin TIMS pas hakërimit nga iranianët
• Sistemi TIMS jashtë funksionit, në Kakavijë dhe Kapshticë po punohet me regjistra
• Hakerat iranianë sulmojnë sistemin TIMS, thotë Rama