KE thirrje palëve politike: Zgjidhni me urgjencë ngërçin në Kushtetuese

Komisioni Evropian ka nxitur palët politike në Shqipëri të zgjidhin me urgjencë ngërçin në Gjykatën Kushtetuese në mënyrë që të sigurohet sundimi i shtetit të së drejtës dhe të zbatohen ndryshimet ligjore të reformës në drejtësi në vitin 2016.

Në një reagim për Euronews Albania, Maja Koçijançiç, Zëdhënësja për Çështjet e Jashtme dhe Politikat e Sigurisë së BE, tha se vlerësimi i përputhshmërisë së hapave për emërimin e anëtarëve të Gjykatës Kushtetuese, nuk i takon BE-së, por theksoi se kriza e interpretimit duhet të zgjidhet me sa më shpejt.

“Reforma në drejtësi, e miratuar unanimisht nga Parlamenti me ndryshimet kushtetuese dhe legjislative të vitit 2016, kishte konceptuar renditjen teknike nga Këshilli i Emërimeve në Drejtësi, kufizimin e diskrecionit të organeve të emërimit me tre kandidatët e parë më të kualifikuar, si dhe zbatimin e mekanizmit zhbllokues pas skadimit të një afati 30-ditor, si mjete të rëndësishme për të forcuar parimin e pavarësisë së institucioneve të drejtësisë, në veçanti të Gjykatës Kushtetuese, si dhe parimet e objektivitetit, meritokracisë dhe vazhdimësisë institucionale në lidhje me emërimin e zyrtarëve të sistemit të drejtësisë”, tha Kocijançiç.

Sipas zëdhënëses së BE, “një interpretim që nuk i pranon këta elementë thelbësorë të mekanizmit të emërimit, siç përcaktohet në Kushtetutë dhe ligjet përkatëse, vë në pikëpyetje parimin e shtetit të së drejtës”.

Komisioni Evropian nga ana tjetër këshillon që çështja të shkojë për mendim në Komisionin e Venecias, si mënyra më efektive për zgjidhjen me përparësi të situatës.