Sulmet kibernetike dhe energjia, zbardhen detajet e takimit Rama-Kurti

Sulmet kibernetike në Shqipëri dhe Kosovë kanë qenë temë e diskutimit të takimi urgjent mes Edi Ramës dhe Albin Kurtit një ditë më parë. Detajet për takimin janë dhënë sot nga Kryeministri i Kosovës.

Të martën Albin Kurti erdhi me urgjencë në Tiranë për të takuar kreun e qeverisë shqiptare edi Rama. Takimi zgjati rreth dy orë në ambientet e vilës qeveritare, por pak detaje dolën në media për temat e diskutuara.

Në një konferencë dhënë për mediat këtë të mërkurë, Albin Kurti ka zbardhur një pjesë të çështjeve që ka diskutuar me Edi Ramën.

“Takimi i djeshëm ka qenë drekë pune me Edi Ramën dhe ka qenë shumë i mirë, konstruktiv e pozitiv dhe i nevojshëm për shkak të temave që i kemi diskutuar. Tema e parë e diskutimi tonë ishte siguria kibernetike. Isha shumë i interesuar të marr vesh më shumë për përvojën e tyre me sulmet e fundit kibernetike që kanë qenë shumë të dëmshme dhe kriminale. Sot e kemi themeluar agjencinë për sigurinë kibernetike me vendim të qeverisë në mbledhjen e sotme”, tha Kurti.

Kryeministri i Kosovës tha se gjatë muajve të dimrit, presin që Shqipëria të ndihmojë me energji elektrike Kosovë.

“Ne tani gjatë verës u kemi dhënë shumë energji elektrike në Shqipëri në mënyrë që ata të na ndihmojnë neve pastaj gjatë dimrit dhe kemi diskutuar për energjinë elektrike në përgjithësi, ata po i vendosin tarifat tash dhe e kemi njoftuar njëri-tjetrin se çka po ndodh në Kosovë e Shqipëri. E njoftova Ramën se ne jemi të parët në Ballkanin Perëndimor që e kemi marr këtë masën për shpërblimin për ata që kursejnë”, u shpreh kreu i qeverisë së Kosovës.

Pjesë e diskutimeve mes kryeministrit Albin Kurti dhe Edi Rama ka qenë dhe çështja e Procesit të Berlinit. Kurti i shpreh se takimet e reja për këtë nisëm do të bëhen nga kancelari i ri i Gjermanisë, Olaf Scholz.

LEXONI GJITHASHTU:

• Çfarë u tha në takimin Rama-Kurti| 5 ngjarjet kryesore
• VIDEO| Momenti kur Kurti ndërpret konferencën për t’u nisur urgjent drejt Tiranës