Kryeministrja suedeze njofton dorëheqjen pas fitores së ekstremit të djathtë

Kryeministrja social-demokrate e Suedisë, Magdalena Andersson pranoi të mërkurën humbjen në zgjedhjet e së dielës, duke i dhënë fitoren bllokut opozitar të ekstremit të djathtë të përbërë nga 4 parti, i cili do të formojë qeverinë e re.

Me 99 për qind të votave të numëruara, vetëm një grusht fletësh votimi mbeten të pallogaritura, por Anderson, që u bë kryeministrja e parë femër e vendit nordik vitin e kaluar, tha se rezultatet tregojnë qartë fitoren e kundërshtarëve.

“Për këtë arsye, do t’i kërkoj kryetarit të Parlamentit të më lirojë nga detyra”, u tha Andersson gazetarëve gjatë një konference për shtyp.

Të Moderuarit, Demokratët Suedezë, Kristian-Demokratët dhe Liberalët kryesonin me një vend të vetëm në Parlament pas zgjedhjeve të së dielës, por tani ata po marrin 176 vende përballë 173 të së majtës.

Këto zgjedhje shënuan një ndryshim radikal të politikës suedeze, me kalimin e pushtetit drejt radikalëve të Demokratëve Suedezë, të njohur për retorikën kundër emigrantëve.

LEXONI GJITHASHTU:

• Zgjedhje të ngushta parlamentare në Suedi, e djathta kryeson në 55 % të qarqeve