Çmontohet rrjeti i krimit të organizuar, sekuestrohen 4 mln euro e qindra kg drogë

Një rrjet masiv ndërkombëtar i krimit të organizuar është shkatërruar në një operacion të përbashkët midis Gardës Civile Spanjolle (Guardia Civil) dhe Byrosë Kriminale Gjermane (Landeskriminalamt) të Hamburgut.

Rrjeti kriminal ofronte shërbime financiare për organizata të ndryshme kriminale të lidhura kryesisht me trafikun e drogës.

Forcat e zbatimit të ligjit kryen 50 kontrolle në shtëpi në të gjithë Spanjën dhe qytetin gjerman të Hamburgut, duke çuar në arrestimin e 44 personave me kombësi kineze, spanjolle, marokene dhe gjermane.

Gjatë ditës që u zhvilluar aksioni autoritetet lëshuan 19 urdhër-arreste ndërkombëtare dhe konfiskuan më shumë se 4 milionë euro në para, bizhuteri dhe 23 automjete luksoze.

Sistemi bankar klandestin me shuma të mëdha parash

Mënyra e funksionimit të përdorur nga rrjeti kriminal konsistonte në lëvizjen e sasive të mëdha të parave përmes një sistemi bankar të sofistikuar nëntokësor.

Grupet e krimit të organizuar nëpërmjet këtij sistemi bënin pagesa, merrnin fonde e madje pastronin të ardhurat e tyre nga ky rrjet financiar i strukturuar ndërkombëtarisht, informon Europol. 

Individët e përfshirë në rrjet morën para cash direkt nga organizatat kriminale. Këto sasi të mëdha parash më pas u transportuan në automjete të pajisura me ndarje të fshehura dhe u futën në një magazinë të përbashkët parash, e cila u shpërnda nëpër vende të ndryshme ndërkombëtare. Organizatat e tjera kriminale mund t’i përdorin këto fonde për të financuar aktivitetet e tyre kriminale ose për të ofruar pagesa ndërkufitare.

U sekuestruan qindra kilogramë drogë

Sistemi i financimit të paligjshëm bazohej kryesisht në paratë e krijuara në tregtinë e paligjshme të drogës, me një pjesë të organizatës që dërgonte deri në 200 kilogramë hashash dhe kanabis në javë nga Spanja në pjesë të tjera të Evropës.

Forcat e rendit sekuestruan 98 kilogramë kanabis, me 123 kilogramë shtesë të sekuestruara disa ditë më vonë, duke çuar  në një total prej 650 kilogramësh. Më tej, gjatë aksionit janë konfiskuar 51 kilogramë hashash.

Roli i Europolit

Qendra Evropiane Financiare dhe Ekonomike e Europolit ka ofruar ekspertizë operacionale, si dhe mbështetje analitike dhe operacionale, për autoritetet e përfshira që nga shtatori 2021. Kjo mbështetje kontribuoi në konfirmimin e lidhjeve me hetime të tjera dhe lehtësoi bashkëpunimin ndërkombëtar midis autoriteteve të përfshira të zbatimit të ligjit.

Ky hetim është kryer në kuadër të Platformës Multidisiplinare Evropiane kundër Kërcënimeve Kriminale (EMPACT). Më konkretisht, ai përfshihet në planin operacional të veprimit “Financat kriminale, pastrimi i parave dhe rikuperimi i pasurive”, i cili synon të luftojë dhe të prishë rrjetet kriminale dhe individët kriminalë që janë të përfshirë në financat kriminale dhe pastrimin e parave.

LEXONI GJITHASHTU: 

• Sekuestrohen mallra të kontrabanduara, në pranga 59 vjeçari në Tiranë
• 100 kg drogë në garazh, arrestohet shqiptari në Itali, qeni e çon prapa hekurave