Putin vlerëson Kinën për qëndrim të balancuar për Ukrainën

Një miqësi pa kufij që kërkon të udhëheqë një botë në ndryshim. Takimi i parë mes presidentëve Vladimir Putin dhe Xi Jinping që nga nisja e luftës në Ukrainë ka larguar çdo dyshim mbi pozicionimin e Pekinit ndaj konfliktit: Kina i kupton arsyet e Rusisë për të ndërmarrë operacionin ushtarak special.

“Ne e vlerësojmë shumë pozicionin e balancuar të miqve tanë kinezë në lidhje me krizën ukrainase”, tha Putin.

Putin e njohu Xi me një pjesë të mesazhit që ai do t’i përcjellë Moskës këtë të premte, gjatë takimit të Organizatës e Bashkëpunimit të Shangait.

“Përpjekjet për të krijuar një botë njëpolare kanë marrë së fundmi një formë të shëmtuar dhe janë tërësisht të papranueshme”, u shpreh presidenti rus.

Edhe përgjigjja e liderit kinez lidhur me botën e dominuar nga Shtetet e Bashkuara, marrëdhëniet me të cilat janë të tensionuara për shkak të Tajvanit, ishte e qartë.

“Përballë një bote që po ndryshon, Kina është e gatshme që së bashku me Rusinë të marrë përsipër rolin e fuqive të mëdha dhe të injektojë stabilitet dhe energji pozitive në një botë të trazuar nga paqëndrueshmëria sociale”, tha presidenti kinez.

Presidenti rus ka zhvilluar gjithashtu takime dypalëshe me liderë të vendeve të tjera të Organizatës së Bashkëpunimit të Shangait, që lindi me idenë për t’iu kundërvënë influencës së Shteteve të Bashkuara në botë.

LEXONI GJITHASHTU:

• Putin takohet me presidentin kinez, diskutohet për Ukrainën
• Pas gazit, Putin kërcënon Europën me një krizë të dytë