COVID-19 i merr jetën një tjetër mjeku në Shqipëri, shkon në 3 totali i viktimave në personelin shëndetësor

Shtohen viktimat prej COVID-19 në radhët e personelit shëndetësor në Shqipëri.

Ministria e Shëndetësisë konfirmoi mëngjesin e së hënës ndarjen nga jeta pas ndërlikimeve të rënda në mushkëri të mjekut pneumolog Anibal Byberi.

Byberi, 53-vjeç, kishte kohë që ishte diagnostikuar me COVID-19 dhe kishte marrë trajtim në shtëpi. Mirëpo të dielën, pas ndërlikimesh të rënda, u shtrua me urgjencë në Spitalin Shefqet Ndroqi, njohur edhe si Spitali COVID-2.

“Pavarësisht ndihmës së menjëhershme të ofruar nga stafi mjekësor, fatkeqësisht, nuk ka mundur të mbijetojë si pasojë e insuficiencës së rëndë respiratorë,” – u tha në njoftimin e ministrisë së Shëndetësisë.

Kryebashkiaku i Bajram Currit, Rexh Byberi shprehu ngushëllimet për ndarjen nga jeta të doktor Anibalit, që siç tha ai “ishte kushëri, shok e mik” që “do t’u mungojë shumë”.

Mjeku Byberi ka drejtuar spitalin e Tropojës prej disa vitesh, ndërsa më parë ka punuar si mjek edhe në burgun 302.

Ai bëhet humbja e tretë në radhët e personelit mjekësor në Shqipëri pas mjekëve Hysni Shkjau dhe Arian Pushi.

Prej 9 marsit, kur u diagnostikua i infektuari i parë me COVID-19 në Shqipëri, autoritetet kanë pikasur rreth 5,500 raste të tjera, prej së cilave 3000 kanë mundur të shërohen, 2300 mbeten ende mbartëse të virusit ndërsa 166 kanë vdekur.

Lexoni gjithashtu:

Vdes mjeku i dytë me COVID-19 në Shqipëri

Mjeku ndërron jetë nga COVID, Yuri Kim: Dha jetën në shërbim, do të kujtohet si hero