Do t’u ofrojmë garanci ushtarëve rusë që dorëzohen, thotë Zelenski

Presidenti i Ukrainës, Volodimir Zelenski u ka ofruar garanci ushtarëve rusë që dorëzohen tek forcat ukrainase.

Në fjalimin e natës të 24 shtatorit, të cilin e mbajti në gjuhën ruse, Zelenski u ka bërë thirrje rusëve të shmangin mobilizimin e pjesshëm ushtarak të vendit të tyre.

“Ukraina garanton tri gjëra për çdo ushtar rus që dorëzohet. Së pari, do të trajtoheni në mënyrë të civilizuar, në përputhje me të gjitha konventat. Së dyti, askush nuk do t’i dijë rrethanat e dorëzimit tuaj, askush në Rusi nuk do ta dijë se dorëzimi juaj ishte vullnetar. Dhe së treti, nëse keni frikë të ktheheni në Rusi dhe nuk dëshironi një shkëmbim, ne do të gjejmë një mënyrë për ta garantuar këtë”, theksoi ai.

Presidenti rus, Vladimir Putin, më 21 shtator njoftoi për mobilizimin ushtarak në mënyrë që të forcohet pushtimi i paprovokuar i Ukrainës dhe pasi forcat ruse pësuan humbje në fushëbetejë.

Më 24 shtator, ai nënshkroi amendamentet që ashpërsuan dënimet për rusët që dorëzohen vullnetarisht ose që refuzojnë të luftojnë, duke i bërë këto veprime të dënueshme me 10 vjet burg.

LEXONI GJITHASHTU

• Votime shtëpi më shtëpi, vijon mbajtja e referendumeve në rajonet ukrainase
• Ukraina zvogëlon praninë diplomatike të Iranit
• ‘Moment i rrezikshëm’, reagon Borrell për kërcënimet e Putin me armët bërthamore