Vizita e Hysenit në SHBA: Bisedova me Grenellin përmes telefonit, mbetet i angazhuar rreth dialogut

Koordinatori shtetëror i Kosovës për dialogun me Serbinë, Skënder Hyseni, ka zhvilluar një bisedë telefonike me të Dërguarin e Posaçëm të Presidentit Trump për dialogun, Richard Grenell.

Kjo bisedë ndërmjet Hysenit, i cili gjendet për vizitë në Shtetet e Bashkuara të Amerikës, dhe emisarit Grenell, u zhvillua përmes telefonit, pasi zyrtari amerikan nuk ndodhej në Washington.

Megjithatë, sipas koordinatorit Hyseni, në këtë bashkëbisedim emisari Grenell tregoi angazhimin dhe përkushtimin e tij për procesin e dialogut, me qëllim të arritjes së një marrëveshje për njohje reciproke.

“Bisedën e përqendruam në aspekte të veçanta të zhvillimeve në Kosovë dhe rajon. Amasadori Grenell mbetet i përkushtuar dhe i angazhuar fuqishëm rreth dialogut Kosovë-Serbi i cili duhet të përmbyllet me njohje të ndërsjellë. Normalizimi i raporteve përmes zhvillimit ekonomik dhe mbështetja e projekteve investive mbeten ne fokus të agjendës dhe përkushtimit të Ambasadorit Grenell”, shkroi Hyseni në profilin e tij në Facebook.

Pas dështimit të takimit të 27 Qershorit në Shtëpinë e Bardhë, emisari Grenell ka qenë më pak aktivë, derisa në Bruksel ka rinisur procesi i dialogut ndërmjet Kosovës dhe Serbisë, me lehtësimin e Bashkimit Evropian.

Dje, mes takimesh me zyrtarë të lartë të Departamentit Amerikan të Shtetit dhe Shtëpisë së Bardhë, Hyseni është pritur edhe nga Zëvendës Ndihmës-Sekretarin për Evropë dhe Euro Azi, Matthew Palmer.