Padia në GJK për votën e diasporës, Milaqi: Seanca u shty për arsye burokratike

Përfaqësuesi i Diasporës në KQZ, Bledar Milaqi, thotë se seanca në Gjykatën Kushtetuese në lidhje me padinë e bërë për mos votimin e emigrantëve në zgjedhjet e 25 prillit, është shtyrë për arsye burokratike.

Në një intervistë për “Euronews Albania”, Milaqi u shpreh se pas konstituimit të KQZ-së, ky institucion, por dhe qeveria shqiptare kishin detyrimin për të mundësuar votën e diasporës në zgjedhjet parlamentare.

“Për fat të keq, seanca është shtyrë. Ne na ka ardhur një informacion që seanca e Gjykatës Kushtetuese është shtyrë. Arsyet konkrete ende nuk i dimë, besoj janë arsye burokratike, ndoshta mungesë dokumetacioni. Në minutën e fundit na ka ardhur informacion që shqyrtimi i dokumentacionit është shtyrë; presim një datë konkrete dhe një arsyetim konkret.

Pas Këshillit Politik, pati një konstituim të KQZ-së dhe iu la në dorë që të miratojë aktet normative që do të mundësonin votën e diasporës. Ky institucion dhe qeveria shqiptare kishte detyrimin që të mundësonte votën e diasporës që në zgjedhjet e 25 prillit”, theksoi ai.

Diaspora për Shqipërinë e Lirë ka dërguar në Gjykatën Kushtetuese padinë për cënimin e së drejtës kushtetuese të votës së emigrantëve në zgjedhjet e 25 prillit të vitit 2021.

LEXONI GJITHASHTU

• Këshilli Kombëtar i PD-së shtyn votimin e rregullores së primareve për të shtunën
• Një qytetar në Itali shkon me kanoe për të votuar
• Votime shtëpi më shtëpi, vijon mbajtja e referendumeve në rajonet ukrainase