Ministria e Arsimit prezanton opsionet, Hoti mbështet rikthimin e nxënësve në klasë

Kryeministri i Kosovës, Avdullah Hoti, ka kërkuar mobilizim të përgjithshëm për fillimin e vitit të ri shkollor.

Në një takim virtual me ministrin e Shëndetësisë, atë të Arsimit, përfaqësues të Institutit Kombëtar të Shëndetësisë Publike, si dhe kryetarët e komunave dhe drejtorët komunalë të arsimit, kryeministri Hoti kërkoi nisjen e përgatitjeve për vitin e ri shkollor, në pajtim me këshillat e ekspertëve shëndetësor.

“Kërkova nga të gjitha institucionet relevante të arsimit në vend që t’i bëjnë përgatitjet e nevojshme për ta filluar sa më mbarë vitin e ri akademik, por gjithnjë duke i marrë parasysh rekomandimet e ekspertëve të shëndetësisë për luftimin dhe parandalimin e përhapjes së pandemisë COVID 19”, njoftoi ai, përmes një postimi në “Facebook”.

Gjatë këtij takimi, ministri i Arsimit shpalosi tri skenarët e mundshëm për fillimin e vitit të ri shkollor 2020-21.

“Ministri i Arsimit, Ramë Likaj theksoi se Ministria e Arsimit dhe Shkencës është në fazën përfundimtare të përgatitjeve për fillimin e vitit të ri shkollor 2020-2021. Ai paraqiti tre skenarët e kësaj ministrie për fillimin e vitit të ri shkollor, të cilët janë: (A) Rikthimi në ambientet shkollore; (B) Mësimi i kombinuar; dhe (C) Mësimi nga platformat e ndryshme”, shkroi Hoti.

Kryeministri Avdullah Hoti tha se do t’i jepet përparësi opsionit për pjesëmarrje fizike të nxënësve në procesin mësimor, por shtoi se skenarët do të zbatohen varësisht sipas kapaciteteve dhe mundësive të komunave, të cilat duhet të përcaktohen për njërin nga opsionet.