Hixhabi i Mahsa Amin trondit botën, përjetësohet përmes veprave të artit

Një vrasje që shkaktoi më pas qindra viktima të tjera.

Mahsa Amin u vra më 16 shtator sepse nuk kishte vendosur si duhet hixhabin, moment ky që solli një valë protestash të dhunshme në rrugët e Iranit.

Rasti i 22-vjeçares ka ngjallur reagime në mbarë botën, ndërsa artistë të ndryshëm janë përpjekur që përmes artit të tyre  të rrisin reagimin qytetar e të mbajnë gjallë protestat.

Ky është dhe rasti i artistit të Instagram-it Jalz, i cili bashkoi në një kolazh Kullën Azadi ose Kullën e Lirisë dhe pikturën e vitit 1910 “La danse” të Henry Matisse.

Piktura simbolizon ndjenjën e çlirimit, ndërsa në sfond është pikërisht vendi i revolucionit iranian. Në të, Jalz ka shkruar një frazë kurde që përkthehet: “Gratë, Jeta, Liria”,  një shprehje simbol kjo që ka shoqëruar çdo protestë për 22-vjeçaren Mahsa Amin.

Për më tepër, lakuriqësia e paraqitur në pikturë është në kontrast me realitetin aktual ku gratë detyrohen të mbulohen. 

Sipas artistit, vepra të tilla e bëjnë jetëgjatë këtë lëvizje sepse pavarësisht gjuhës apo dallimeve kulturore, të gjithë mund të biem dakord se ka një ngurtësi që rrethon lirinë e grave iraniane.

LEXONI GJITHASHTU:

• Solidaritet me vajzën e vrarë për hixhabin, 75 viktima nga protestat në Iran