Deputeti i PD-së: Mjeku Alimehmeti do ishte kandidat i duhur për Bashkinë e Tiranës

Deputeti i Partisë Demokratike, Lefter Gështenja thotë se mjeku Ilir Alimehmeti, do të ishte kandidati i duhur për këtë forcë politike, në garën për Bashkinë e Tiranës, pasi në kampin blu po përflitet emri i tij.

Në një intervistë për Euronews Albania, Gështenja u shpreh se Alimehmeti mund të marrë vota nga elektorati gri.

Por, sipas tij, nëse Alimehmeti do të garonte në primaret e PD-së, nuk do të kishte sukses, pasi në bazë prevalojnë figurat politike.

“Duke dalë një figurë politike për zgjedhjet vendore, nuk është e lehtë të konkurrohet nga një intelektual, sado i mirë dhe i pëlqyer të jetë në opinionin publik. Është normale që një njeri, i cili është politik, që punon me strukturat, i ka lidhjet më të mëdha me strukturat  dhe do të bëjë më shumë vota. Në këtë mënyrë, zbehet garimi apo kandidimi i njerëzve të ndershëm. Më lejoni të kujtoj një emër, të cilin rastësisht e kam dëgjuar në disa biseda për Tiranën, personalisht nuk e njoh, doktor Ilir Alimehmeti.

Një figurë, e cila do ishte fantastike për garën e Tiranës. Jo se nuk ka figura politike, por nëse do duam të marrim vota nga pjesa gri, mund të jetë një figurë shumë e mirë. Nëse zoti Alimehmeti, do të futet në garë në primaret, jam i sigurt që do të sfumohet, sepse prevalon figura politike që ka lidhje me strukturat”, theksoi ai.

LEXONI GJITHASHTU

• PD duhet të dalë në zgjedhjet vendore me një kandidat, thotë Gështenja
• Financimet ruse në PD, Lefter Gështenja: Nëse ka prova le të shkojnë në prokurori