Radhë tek qendra e konsultave/ Qytetarët presin me orë për të marrë shërbimin

Merjuze Merkaj është nisur në orën 5 të mëngjesit nga fshati Fratar i Mallakastrës për të kryer analizat në Tiranë. 62-vjeçares i duhet të presë mjekun deri në orën 14:00 tek Qendra e Konsultave.

“Kemi që në mëngjes këtu, presim përgjigjen e analizave, në orën 14:00 vjen Doktori. Jemi nisur që në orën 5 të mëngjesit dhe mbërritëm në orën 8 këtu. Nisemi pastaj kur të marrim përgjigjen e analizave në orën 14:00 në orën 19:00 arrijmë në shtëpi”

Mes qytetarëve që presin për të kryer konsulta me mjekun ka edhe nga ata të cilët nuk arrijnë të marrin shërbimin.

“Kemi një javë që vijmë nga Durrësi nuk po na japin zgjidhje. Të rekomandojnë të shkosh tek spitali privat, por nuk kam mundësi ekonomike.”

“Kemi rreth një orë që presim, vijmë nga Elbasani. Presim analizat”

“Po pres për rimbursimin e ilaçeve të insulinave. Pres të marrë recetën”- shprehen qytetarët.

Siç shihet përmes pamjeve qytetarët janë të detyruara të presin për orë të tëra në radhë të gjatë.

Euronews Albania përmes një shkrese zyrtare i është drejtuar Qendrës Spitalore Universitare ‘Nënë Tereza’ ku ka kërkuar informacion për numrin e mjekëve që shërbejnë në Qendrën e Konsultave si dhe vizitat ditore që kryen një mjek, por akoma nuk ka marrë një përgjigje.

LEXONI GJITHASHTU: 

• Meta: Partia e Lirisë do rikthehet fuqishëm, synojmë edhe Këshillat Bashkiakë
• Virozat e stinës, fluks në qendra shëndetësore/ Simptomat: temperaturë dhe rrufë