Albin Kurti: Takimi në Shtëpinë e Bardhë, pjesë e fushatës për zgjedhjet presidenciale

Takimi i 2 shtatorit në Shtëpinë e Bardhë ndërmjet kryeministrit të Kosovës, Avdullah Hoti, dhe presidentit të Serbisë, Aleksandër Vuçiç, nga kreu i Lëvizjes Vetëvendosje Albin Kurti po shihet si pjesë e fushatës për zgjedhjet presidenciale në Shtetet e Bashkuara të Amerikës.

Ne reagimin e tij në Facebook, ish-kryeministri Kurti kritikon qasjen e të Emëruarit Special të Presidentit Trump, për dialogun Kosovë – Serbi, Richard Grenell.

“Rreth 80 ditë kanë ngelur deri te zgjedhjet e reja në ShBA ku Presidenti Donald Trump përballet me kandidatin demokrat Joe Biden. Fushata atje po intensifikohet ende pa filluar zyrtarisht. Në këtë kontekst duhet të shihet edhe 2 shtatori si datë e paralajmëruar e negociatave ndërmjet Kosovës e Serbisë në Washington D.C. Ish ambasadori amerikan në Berlin dhe ish u.d. i Drejtorit të Inteligjencës Nacionale, Richard Grenell, e do një sukses të orëve të fundit në politikën e jashtme. Ai pardje kritikoi z. Biden që “premton se problemet e botës do t’i bëjë përgjegjësi të ShBA-ve”, kurse sot vetë ai bëri thirrje për negociata midis Kosovës e Serbisë”, shkroi ai.

Teksa emisarit Grenell i referohet si “cowboy”, Kurti thotë se i njëjti ka ndryshuar pozicionin amerikan, duke hequr dorë nga kërkesat ndaj Serbisë.

“Grenell është i njëjti diplomat që thoshte se nuk ka parë e as diskutuar ndonjëherë për ‘shkëmbim territorial’. Pastaj akuzonte ish Këshilltarin e Sigurisë Nacionale, John Bolton, se ai paska qenë prapa këtij plani, ndërkaq ky i fundit u përgjigj duke thënë se atë e ka dëgjuar nga dy presidentët, të Kosovës e të Serbisë. Në janar të këtij viti Grenell ndryshoi pozicionin e deriatëhershëm amerikan dhe braktisi të gjitha kërkesat ndaj Serbisë në raport me Kosovën. Grenell ia ka mësyrë kontestit Kosovë-Serbi si një cowboy i financave dhe medieve që nuk do t’ia dijë për historinë e shqiptarëve dhe vuajtjet e humbjet e Kosovës”, theksoi tutje Kurti.

Kryetari i partisë më të madhe në Kosovë, tha se emisari Grenell po flet për negociata që kanë destinim kompromisin dhe nuk sjellin dobi, dhe jo për dialog.

“Në njoftimin e tij, Grenell tanimë nuk flet për dialog por për negociata. E, negociatat kanë për destinim kompromisin. Kushtetuta e Kosovës e ka përbrenda kompromisin e dhimbshëm të pakos së Ahtisaarit, ndërkaq Kushtetuta e Serbisë vazhdon synimet e Milosheviçit, duke theksuar qysh në fjalinë e dytë të saj se Kosova është pjesë integrale e Serbisë. Nuk mund të ketë as drejtësi e as dobi nga një qasje e tillë”, potencoi ai.

Duke besuar në reciprocitetin si parim për dialog me Serbinë, Albin Kurti, pa i përmendur emrin, tha se kryeministri Hoti nuk ka legjitimitet për të negociuar për Kosovën.

“Ata që nga Kosova po duan të shkojnë në këto negociata të thirrura për 2 shtator nuk kanë legjitimitet, kredibilitet, autoritet e as kompetencë. Rrjedhimisht, marrëveshjet e tyre janë të pazbatueshme, dhe, nuk vlejnë as sa çmimi i letrës ku shkruhen”, përfundoi ai.

Mëngjesin e sotëm, emisari Richard Grenell njoftoi se më 2 Shtator, në Shtëpinë e Bardhë, do të mbahet një takim negociues ndërmjet Kosovës dhe Serbisë.