Messi do largimin nga Barça, Manchester City destinacioni i mundshëm

Humbja me Bayern Munich ka krijuar një furtunë tek Barcelona, ku pritet një revolucion i madh duke nisur që nga kjo verë.

Leo Mesi duket se është drejt largimit nga Barcelona dhe tashmë situata duket mjaft serioze. Sipas mediave spanjolle, argjentinasi ua ka bërë të qartë drejtuesve se cikli i tij në Katalonjë ka përfunduar dhe ai do të kërkojë një destinacion të ri.

Eliminimi nga Champions duket se ka mbushur kupën për sulmuesin, i cili prej kohësh ishte përfolur për një largim të mundshëm nga “Camp Now”.

Pas këtij lajmi, mediat kanë nisur menjëherë aludimet se ku mund të jetë e ardhmja e 33-vjeçarit. Manchester City konsiderohet si një prej skuadrave favorite ku Mesi mund të zgjedhë të vazhdojë karrierën, pasi atje do të bashkohej me Pep Guardiolën.

Për Mesin interesim kishte dhe Interi, megjithatë tashmë konkurrenca rritet dhe zikaltrit duhet të veprojnë më konkretisht nëse duan të sigurojnë shërbimet e pesë herë fituesit të Topit të Artë.

Në anën tjetër mediat spanjolle janë të bindura se dhe Quique Setien është shkarkuar dhe për të pritet vetëm zyrtarizimi i klubit. Në ditët në vijim pritet që klubi spanjoll të nisë dhe spastrimet, ku rrezikojnë jo pak futbollistë që të marrin valixhet.