Rënia e ‘republikës së drogës’, aksioni i 2014 në Lazarat sekuestroi 40 tonë hashash

Në qershor të vitit 2014, 1 vit pasi kishte ardhur në pushtet, qeveria “Rama” vendosi të ndërhyjë në Lazarat, fshatin që ishte simboli i kultivimit të drogës në gjithë vendin.

Aksioni përfshiu rreth 1 mijë forca policore dhe drejtohej nga drejtori i Përgjithshëm i Policisë së Shtetit, Artan Didi.

Për më shumë se një javë, forcat e policisë kryen kontrolle në gjithë shtëpitë e fshatit duke realizuar kapjen e një sasie rekord droge. Në një bilanc përfundimtar të aksionit, rezulton se u kapën rreth 40 tonë hashash, mbi 100 mijë rrënjë kanabis sativa, si dhe qindra armë e municione të llojeve të ndryshëm.

Në polici u shoqëruan rreth 200 banorë të fshatit, për mbjellje, kultivim të lëndëve narkotike, si dhe armëmbajtje pa leje. Nga këta rreth 20 u dërguan për gjykim dhe morën dënime të ndryshme.

Aksioni në Lazarat në vitin 2014 u cilësua si një nga më të suksesshmit, duke i dhënë fund paligjshmërisë që vijonte që prej 20 vitesh në këtë zonë. Guardia Di Finanza Italia në raportet e saj vlerësonte se nga ky fshat çdo vit prodhohej droge që në treg arrinte vlerën e 4 miliardë eurove.

Por operacioni i vitit 2014 nuk ishte i vetmi. Një vit më pas, në qershor të 2015, një tjetër operacion i policisë në këtë fshat solli përplasje të ashpra me armë mes grupeve kriminale dhe policisë.  Nga shkëmbimi i zjarrit mbeti i vrarë efektivi i RENEA-s Ibrahim Basha, si dhe u plagosën sy efektivë të tjerë të policisë. Për ngjarjen u arrestuan 12 banorë të Lazaratit, 5 prej të cilëve u dënuan me burg për akuzën e vrasjes dhe goditjes së forcave të policisë.

Pas aksionit të policisë në vitet 2014-2015, Lazarati doli nga harta e zonave të trafikut të drogës.

LEXONI GJITHASHTU:

• Rama dhe Tahiri kanë kryer krime kundër njerëzimit në Lazarat, thotë Berisha
• “Më rrezikohet jeta në burg”, ish-ministri Tahiri kërkon lirimin