Përplasjet brenda koalicionit qeverisës në Kosovë, shtyhet për të hënën takimi i liderëve të partive

Është shtyrë për të hënën takimi i krerëve të koalicionit qeverisës në Kosovë, planifikuar të mbahej pasditen e sotme.

Një ditë më parë nga partitë në qeveri u deklarua se pas kthimit në zyrë të kryeministrit Avdullah Hoti, tashmë i shëruar nga coronavirus, do të takohej me kryetarin e Aleancës për Ardhmërinë e Kosovës, Ramush Haradinaj dhe atë të Nismës Socialdemokrate, Fatmir Limaj.

Sot theksohet se takimi është shtyrë për arsye objektive, të cilat nuk bëhen të ditura.

Që nga takimi i kryeministrit Avdullah Hoti me presidentin e Serbisë Aleksandar Vuçiç në Bruksel dhe pas emërimit të Skënder Hysenit në pozitën e koordinatorit shtetëror për dialogun me Serbinë, lideri i AAK-së Ramush Haradinaj dhe partia e tij kanë kritikuar ashpër shefin e ekzekutivit për qasjen ndaj procesit të dialogut me Beogradin.

Ndërkaq, mospajtimet dhe kritikat ndërmjet partnerëve të koalicionit nuk kanë munguar as në rastin e hyrjes së xhandarmërisë serbe në Karaçevë, por edhe në lidhje me shpalljen e kandidaturës së Haradinajt për president të vendit.

Ndërkohë, gjatë periudhës kur kryeministri Hoti ka qenë në vetizolim për shkak të infektimit me COVID-19, AAK dhe Nisma janë shprehur të hapura për zgjerimin e koalicionit qeverisës edhe me Partinë Demokratike.