Qeveria ‘harron’ listën, ndërtimet pa leje humbasin korridoreve të IKMT

Kemi pritur prokurorinë që të veprojë dhe prokuroria nuk vepron. Me këto fjalë, kryeministri Edi Rama argumentonte gjatë një interviste për Euronews Albania, se pse u mor tani vendimi për konfiskimin e pallateve dhe kateve pa leje.

Vendimi ngarkon Inspektoratin e Mbrojtjes së Territorit të mbështetur nga Policia e Shtetit për ta zbatuar.

“Këto ambiente po i merr shteti. Këto para po i merr shteti. Këtu është fundi i kësaj historie shumëvjeçare”, u shpreh Rama.

Bilanci publik i operacionit deri më tani është ai i sekuestrimit të një pallati dhe kateve shtesë në zonën e Farkës dhe dhurimi i 4600 metrave katrorë nga ndërtuesi në qendër të Tiranës.

“Grupet po vazhdojnë të identifikojnë në të gjithë Tiranën dhe aksioni do të shtrihet në të gjithë Shqipërinë”, qe shprehur ministri i Brendshëm Bledi Çuçi.

Euronews Albania ka mësuar se që në ditët e para të aksionit janë identifikuar mbi 30 objekte pa leje, ose në shkelje të lejes në Tiranë.

Lista ndodhet në zyrat e IKMT-së për zbatimin e vendimit të qeverisë për këto objekte. Por, nga IKMT nuk ka asnjë reagim. Euronews Albania i është drejtuar me një kërkesë për informacion.

LEXONI GJITHASHTU:

• Aksioni për ndërtimet pa leje, Bogdani: Qokë që po u bëhet oligarkëve
• Ndërtimet pa leje, Ben Andoni: Standard i dyfishtë, Rama të kursejë daljet publike