Trualli i portit në Durrës, nënshkruhet kontrata për vlerësimin e cilësisë së tokës

Trualli ku janë parashikuar të ngrihen godinat rezidenciale dhe zonat rekreative në kuadër të projektit të shndërrimit të Portit të Durrësit në port turistik do t’u nënshtrohet analizave kimike dhe gjeoteknike.

Porti i Durrësit ka nënshkruar kontratën me kompaninë fituese të tenderit të hapur që në qershor të këtij viti. Kontrata parashikon hartimin e një raporti studimor brenda 45 ditëve mbi përmbajtjen e sulfateve, metaleve të rënda dhe hidrokarbureve deri në thellësitë e themeleve të godinave të parashikuara.

Kompania private duhet të vlerësojë nëse ndotja është brenda parametrave ndërkombëtare, apo jo. Nëse jo, atëherë duhet të ofrojë në një hap të dytë konsulencë për rehabilitimin e saj.

Pjesa e truallit që do të analizohet është përdorur ndër vite për shkarkimin e mallrave, si kimikate bujqësore, industriale dhe karburanteve deri para ngritjes së Porto Romanos. Ky aktivitet është ushtruar për gati një shekull.

Qeveria ka nënshkruar një kontratë me grupin EMAAR për shndërrimin e portit aktual të Durrësit në një port turistik.

Projekti ambicioz prej 2 miliardë dollarësh pretendon të kthejë këtë zonë në një nga më tërheqëset në Mesdhe. Ndërkohë, porti i ri i mallrave do të ndërtohet në Porto Romano, pranë portit aktual të hidrokarbureve.

LEXONI GJITHASHTU

• ‘Parcela me kanabis’, Zhuri: Shefi i Komisariatit bashkëpunon me trafikantët
• Sekretari i Bashkisë së Vaut të Dejës: Shefi i komisariatit më kërcënoi
• Në PS po zhvillohet betejë për jetë a vdekje midis Veliajt dhe Ramës, thotë Berisha