Qeveri pakice në Suedi, liberalët mbështeten tek ekstremistët e djathtë

Tre parti suedeze nga kampi liberal dhe ai i djathtë kanë njoftuar formimin e një qeverie pakice. Koalicioni varet nga mbështetja e populistëve të ekstremit të djathtë, Demokratët Suedezë, që doli forca e dytë politike në vendin nordik në zgjedhjet e përgjithshme të muajit të kaluar.

“Kjo qeveri do të punojë ngushtë me Demokratët Suedezë në Parlament. Deputetët e kësaj partie do të kenë zyrën e tyre të bashkëpunimit me zyrtarët e qeverisë”, tha Ulf Kristersson, lider i partisë Të Moderuarit.

E themeluar nga aktivistë ekstremistë, subjekti është rritur nga një lëvizje në parti me mbi 20 për qind të votave nën udhëheqjen e Jimmie Akesson.

“Për ne është jetike që ndryshimi i qëndrimit të pushtetit ndaj politikës së emigracionit të jetë një ndryshim paradigme. Personalisht nuk kam asnjë dyshim që marrëveshja nënkupton këtë”, u shpreh Jimmie Akesson, lider i Demokratëve Suedezë.

Fushata elektorale në Suedi u dominua nga çështje si rritja e kriminalitetit, emigracioni, integrimi dhe rritja e çmimeve të energjisë, tema me të cilat ekstremi i djathtë mund të shënojë disa arritje.

Sidoqoftë, pjesëmarrja në qeveri do të kishte qenë thyerje e një tabuje, pasi liberalët kishin vendosur vijat e kuqe.

LEXONI GJITHASHTU:

• Zyrtarët amerikanë e turq diskutime për anëtarësimin e Finlandës e Suedisë në NATO
• Gjermania, Danimarka dhe Suedia formojnë një ekip të përbashkët mbi Nord Stream