Artan Shkëmbi mbetet i pezulluar, Gjykata e Lartë refuzon kthimin në detyrë

Gjykata e Lartë refuzon kthimin në detyrë të ish-zëvendësdrejtorit të OFL-së, Artan Shkëmbi. Në fakt ky i fundit ishte tërhequr vetë nga rekursi.

Ish-zyrtari i lartë i policisë po hetohet për nxjerrje sekreti dhe dosja e tij i kaloi prokurorisë së Tiranës nga SPAK.

Prej dhjetorit 2020 ish numri 2 i operacionit forca e ligjit vijon të jetë i pezulluar nga detyra. Vendimi është lënë në fuqi edhe nga gjykata e lartë pak javë më parë, megjithëse para se të merrej në shqyrtim, ish-drejtori i hetimit ne task forcen qendrore, është tërhequr nga rekursi, për shkaqe që nuk dihen. Shkëmbi u hetua fillimisht nga SPAK, por pas rënies së akuzës për korrupsion prokuroria e posaçme shpalli moskompetencën duke I kaluar dosjen Prokurorisë së Tiranës me akuzën e vetme “Zbulimi i akteve ose të dhënave sekrete”.

Sipas hetimeve të detajuara që përshkruhen në vendim, Artan Shkëmbi mori të dhëna në sistemin Deep See për dy shtetas të hetuar në Gjermani, konkretisht Klaudio Vukaj dhe Aleksandër Prroni. Për këta të fundit oficeri ndërlidhës në ambasadën Gjermane kishte kërkuar verifikimin e pasurive në Shqipëri pasi po hetoheshin si pjesëtarë të një organizate kriminale. Nga hetimet rezulton se këtyre shtetasve , informacioni i është dërguar me komunikimin me Enchrochat, duke e fotografuar sipër një aparati telefoni Iphone 10.

Ky celular kishte fotografuar informacionin  e ndodhur në Deep See, nga ekrani i kompjuterit. Nga hetimet ka rezultuar se informacioni i është përcjellë nga një person i tretë i paidentifikuar pak orë pasi Artan Shkëmbi ishte loguar në sistemin e të dhënave Deep See. Për këtë rast janë marrë në pyetje edhe oficerë të tjerë të policisë, anëtarë të strukturës së quajtur “ ORKA ”, e përberë me hetues gjermanë e shqiptarë.

LEXONI GJITHASHTU:

• Gjykata e Tiranës i heq masën e sigurimit “pezullim nga detyra” Artan Shkëmbit
• Bie akuza për korrupsion, çështja e Artan Shkëmbit kalon në Prokurorinë e Tiranës