Evropa në alarm, euro-deputetët: Të forcohet siguria e infrastrukturës energjetike

Norvegjia ka përforcuar mbikëqyrjen e infrastrukturës energjetike nga frika se ajo mund të bjerë pre e akteve të sabotazhit.

Nga burimet norvegjeze do të furnizohen disa nga vendet e Evropës këtë dimër dhe shpërthimet që dëmtuan gazsjellësit “Rrjedha e Veriut” bënë që për momentin ata të jenë jashtë shërbimit. Shumë ligjvënës evropianë kanë ngritur shqetësimin.

“Arma e preferuar e presidentit Putin do të jetë gazi dhe terminalet alternative të gazit të lëngshëm po mbikëqyren nga aktorë kibernetikë nga Rusia. Në këtë pikë do të doja një përpjekje më shumë nga Komisioni Evropian për të mbrojtur strukturat tona në Holandë, Gjermani dhe Spanjë”, tha Bart Groothuis, euro-deputet holandez.

Brukseli propozoi të martën kryerjen e të ashtuquajturave “teste stresi” për infrastrukturën kritike në sektorët kyç.

Danimarka dhe Suedia kanë shtuar gjithashtu mbikëqyrjen në këto objekte. Sulmet ndaj gazsjellësve “Rrjedha e Veriut” 1 dhe 2 ndodhën në ujërat e tyre. Hetimet përcaktuan se bëhej fjalë për një akt sabotazhi, por nuk zbardhën dot autorin.

Sytë u kthyen nga Rusia, që mohon të ketë sulmuar gazsjellësit dhe që e ka drejtuar gishtin e akuzës ndaj Shteteve të Bashkuara, si përfituesit kryesorë nga situata.

LEXONI GJITHASHTU

• NATO nis stërvitjen ushtarake për parandalimin bërthamor, dhjetëra avionë mbi Evropë

• NATO paralajmëron Rusinë: Pasoja serioze nëse përdor armë bërthamore ndaj Ukrainës
• A do të ketë Luftë të III Botërore nëse Ukraina pranohet në NATO?