Universiteti Mesdhetar, studentët 3 ditë kohë për të zgjedhur online degën që duan

Raundi i tretë dhe i fundit i aplikimeve nisi sot dhe maturantët do të kenë vetëm 3 ditë kohë për të përzgjedhur online degët ku duan të nisin studimet e larta.

Rektori i Universitetit Mesdhetar të Shqipërisë, Adrian Civici ftoi sot kandidatët të zgjedhin këtë universitet duke respektuar afatet ligjore.

“Universiteti Mesdhetar i Shqipërisë, ju fton që ta shfrytëzoni këtë mundësi të fundit, të regjistroheni në auditoret tona, në një nga fakultetet tona, Fakulteti i Ekonomisë, Fakulteti i Informatikës dhe Fakulteti i Shkencave Juridike dhe Humane. Aty do gjeni programet e duhura, pedagogë cilësorë dhe një formim profesional”, theksoi ai.

Rektori sqaroi se këtë vit, oferta akademike e Universitetit Mesdhetar është e larmishme dhe aktualisht po vijojnë edhe regjistrimet në programet master.

“Universiteti Mesdhetar i Shqipërisë ka një ofertë të larmishme, për të gjithë ata që duan të specializohen, t’i thellojnë studimet e tyre, qoftë në kuadrin e masterit profesional, ashtu dhe të masterit shkencor, për të dalë ekspertë të mirëfilltë dhe të shumëkërkuar në tregun e punës për fushat që ata do zgjedhin”, tha Civici.

Universiteti Mesdhetar ka aktualisht 3500 studentë në tre fakultetet e tij, atë të Informatikës, Ekonomisë dhe Drejtësisë e Shkencave Humane.