Vrasja e Ndojt, dëshmia e dy vëllezërve: Na sulmoi i pari, e lamë të gjallë kur ikëm

Është zbardhur një pjesë nga dëshmia e vëllezërve Miri, të cilët janë arrestuar si autorë të dyshuar për vrasjen 34-vjeçarit Indrit Ndoj, ngjarje e ndodhur mbrëmjen e së enjtes në Fushë Krujë.

Vëllezërit Sajmir Miri dhe Landi Miri, të cilët ndodhen në komisariatin e Krujës para autoriteteve kanë deklaruar se nuk kanë pasur për qëllim ta vrisnin të riun, ndërsa kanë shtuar se me këtë të fundit janë takuar për të sqaruar një muhabet.

Sipas tyre, në momentin që e kanë goditur Ndoj ka rënë përtokë, ndërsa janë larguar duke e lënë atë të gjallë.

Vëllezërit kanë deklaruar se ka qenë Ndoj, i pari që i sulmoi.

“Ai ishte rëndë, kishte pirë drogë. Ne kishim një problem mes nesh për të sqaruar dhe e kishim lënë që të takoheshim.  Nuk e dimë se çfarë kishte bërë përpara se të vinte te ne.

Në fillim na ofendoi e pastaj u bë agresiv, na sulmoi me apo pa vetëdije këtë se dimë. Pas kësaj ne reaguam dhe e qëlluam me kaçavidë, atë kishim me vete. Më pas kur e pamë që ra përtokë u larguam. Pamë që po merrte frymë, ishte gjallë. Ne s’donim ta vrisnim, ishte çdo gjë momentale. Ne shkuam për të sqaruar një muhabet, të vjetër. Pamë në lajme në mëngjes se ai kishte vdekur”- mësohet të kenë thënë ata.

Indrit Ndoji u gjet i pajetë në një kanal në anë të rrugës nga familjarët e tij ndërsa ishin nisur për punë.

LEXONI GJITHASHTU: 

• Arrestohen dy vëllezër, të dyshuar si autorë të vrasjes së Indrit Ndojt
• Specialisti i shëndetit publik, Indrit Seferi: Situata është alarmante, e vetmja zgjidhje shtimi i testeve
• FOTO/ Familjarët e gjetën të pajetë në kanal, detaje nga vrasja në Fushë-Krujë