4 ukrainas arrestohen në RMV, dyshohen për gërmime në një vend arkeologjik 

Në Maqedoninë e Veriut, katër shtetas të Ukrainës janë arrestuar nën dyshimin se kanë gërmuar ilegalisht artefakte në një nga lokacionet më të pasura arkeologjike maqedonase, Isar, njoftoi policia.

Në njoftim thuhet se ata janë arrestuar të premten teksa po gërmonin në atë lokalitet, jo shumë larg kufirit me Greqinë.

Tek të dyshuarit janë gjetur dy detektorë metali, lopata dhe disa objekte të gërmuara, raporton AP.

Emrat e të dyshuarve nuk janë bërë të ditur, por në njoftim thuhet se të gjithë kanë pasur leje për qëndrim të përkohshëm në Maqedoninë e Veriut.

Nëse shpallen fajtorë në gjykatë, rrezikojnë deri në 10 vjet burg.

Ka më shumë se 200 varre në Isar dhe gërmimet datojnë nga epoka e bronzit deri në antikitetin e vonë.

Aty gjenden edhe mbetjet e një tempulli dhe një stadiumi të ndërtuar në stilin e lashtë romak.

LEXONI GJITHASHTU:

• Arkeologët gjejnë monedha ari të shekullit të 7 në murin e një rezervati
• 32 gërmime arkeologjike, arkeologët do të nisin kërkimet nga veriu në jug