Art kundër urrejtjes/Artistët e muraleve në Maqedoni zbukurojnë qytetet me grafite

Dikur gjobiteshin dhe përndiqeshin për prishje të qetësisë publike dhe shkatërrim të pronave, ndërsa sot quhen artistë që zbukurojnë qytetin me grafite.

Një djalë i ri nga Kumanova, Dejvid Stoillovski është investuar në zbukurimin e qytetit të lindjes.

“Që i vogël e kam pasur pasion të bëj grafite nëpër mure. Dëshira ime ka qenë mbulimi i pamjeve të zymta që kaplonin mendjen e njeriut kur i shikonte. Tani i jam dedikuar zbukurimit të lagjes ku jam lindur e rritur”- tha ai.

Nisur nga konflikti i vitit 2001 në Maqedoninë e Veriut, artistit ju shtua më shumë dëshira për të mbuluar vizatimet që nxisnin urrejtje mes shqiptarëve dhe maqedonasve

“Ka patur mbishkrime të ndryshme të pahijshme, ofendime, sharje, gjëra të pahijshme për një shoqëri normale, kështu që ne me ekipin tonë tentojmë që ta mbulojmë këtë gjë të  keqe dhe të bëjmë diçka të bukur, interesante, e cila mund të kënaqë njerëzit”-shtoi ai.

Mbeshtetja nga shteti për grupin ku bën pjesë dhe Dejvidi është e papërfillshme.

“Pushtetarët ndonjëherë na mbështesin, ndonjëherë jo. Kur bëjmë diçka me vetë iniciativë, vijnë na përkrahin, por e bëjnë me qëllim që të marrin meritat vetë”- nënvizoi i riu.

Dëshira e grupit të artistëve është që të ndërgjegjësojnë komunitetet që problematikat sociale ti trajtojnë përmes artit grafik.

LEXONI GJITHASHTU: 

• Pas 5 muajsh, ulet çmimi i gazit në Europë
• Truss mban fjalimin e fundit si kryeministre e Britanisë: Ishte nder për mua