EuCham rendit Shqipërinë nga fundi në Evropë për të bërit biznes, Basha: Vendit i duhet model i ri ekonomik

Kryetari i Partisë Demokratike, Lulzim Basha, shfrytëzoi të enjten raportin e European Chamber për të kritikuar qeverinë dhe për të promovuar më tej propozimin e opozitës për taksë të sheshtë në ekonomi.

Përmes një postimi në Twitter, Basha tha se me qeverinë Rama “Shqipëria u bë ndër vendet më të korruptuara, me taksat më të larta në rajon” dhe “më pak tërheqëse për investimet”.

“Vendit sot i duhet një model i ri ekonomik, me taksa të ulëta, mbështetje për sipërmarrjen, stimulim për investimet dhe bizneset që hapin vende pune. Me planin tonë ne do të kemi taksën e sheshtë 9%, do të luftojmë konkurrencën e pandershme dhe korrupsionin, do ti japim frymëmarrje ekonomisë për të sjellë investime, mundësi punësimi me të ardhura dinjitoze dhe jetë më të mirë për të gjithë shqiptarët,” – shkroi Basha në Twitter.

Prej së paku 5 muajsh opozita ka paraqitur një pjesë të programit të saj ekonomik, ku në qendër ka vendosur taksimin e sheshtë 9 për qind. Ky lloj taksimi ka hasur kritika nga ana e shumicës socialiste, e cila e ka cilësuar atë të dëmshme për familjet me të ardhura mesatare, mirëpo nga ana e opozitës këmbëngulet për të kundërtën.

Komenti i Bashës vjen një ditë pasi qeveria, përmes ministres së Financave Anila Denaj ripërcaktoi pritshmëritë e rritjes ekonomike për vitin e ardhshëm nga 12 për qind sikurse e parashikonte Banka Evropiane për Rindërtim dhe Zhvillim në 5 për qind.

European Chamber, ose siç njihet ndryshe EuCham është një organizatë e pavarur, joqeveritare, e cila vlerëson të bërit biznes në Evropë.

Në raportin e fundit për vitin 2020, EuCham ka vlerësuar 46 vende nga Evropa, në të cilin Shqipëria renditet ndër tre vendet e fundit bashkë me Bosnje e Hercegovinën dhe Ukrainën.

Vlen të thuhet se sipas EuCham klimë më të mirë për të bërë biznes se sa Shqipëria (51 pikë) ka Kosova (55 pikë), Serbia (57 pikë), Maqedonia e Veriut (58 pikë) dhe shumë më shumë edhe Mali i Zi (59 pikë). Vlerësimi i EuCham bazohet në të dhënat e Bankës Botërore dhe indekseve ekonomike të Transparency International.

Në vitin 2019 Shqipëria vlerësohej nga EuCham me 52.76 pikë. Vlerësim në ulje është vërejtur edhe nga raportet e shkuara të Bankës Botërore (67.7 pikë nga 69.5 që vlerësohej një vit më parë) dhe nga indeksi i Transparency International (35 pikë nga 36 që vlerësohej një vit më parë).

Lexoni gjithashtu:

Ekonomia do të rritet 5%, turizmi shihet si shpëtimtari i të ardhurave

Basha: Shqipëria me pagat më të ulëta në rajon, shkak taksimi progresiv

Basha: Raporti i AmCham për klimën e biznesit shqetësues, zgjidhjen e jep platforma e opozitës

Klima e të bërit biznes, Arben Malaj thirrje qeverisë: Koha që të ketë ngrirje të çdo ndryshimi në nivel taksash

Bozdo: Socialistët gënjejnë, shtresën e mesme e lehtëson taksa e sheshtë, jo taksa progresive