Helmimi i Navalny, politikanët gjermanë presion Merkel për “Rrjedhën e Veriut 2”

Ndaj Rusisë është e nevojshme një përgjigje evropiane, që përfshin edhe gazsjellësin “Rrjedha e Veriut 2”. Kështu kanë deklaruar të enjten disa politikanë dhe diplomatë gjermanë, pas lajmit se kritiku i Kremlinit, Alexei Navalny, ishte helmuar me agjent nervor.

Lideri i CSU-së dhe njëkohësisht kryeministër i landit të Bavarisë, Markus Soeder deklaroi se mbështet kursin aktual të kancelares Merkel ndaj çështjes, por shtoi se Evropa duhet të dalë me një përgjigje inteligjente, afatgjatë dhe të unifikuar.

Sa i takon “Rrjedhës së Veriut”, Soeder tha se vendimi nuk i takon shtetit, pasi bëhet fjalë për sektorin privat, por shtoi se Gjermania duhet t’u përmbahet vlerave të saj.

“Në opinionin tim, dy gjërat nuk kanë lidhje me njëra-tjetrën. Por në të njëjtën kohë, zbulimet hedhin një dritë negative mbi projektin, edhe pse hapat e parë që duhet të ndjekim janë ato diplomatikë dhe politikë. Diplomacia jonë ka si prioritet ruajtjen e balancës. Në lojë ka interesa të forta, por ne duhet gjithashtu t’u qëndrojmë vlerave tona, të cilat në këtë moment po sfidohen”, deklaroi Soeder.

Një ditë më parë, kancelarja Merkel deklaroi se pret që Moska të japë sqarime mbi rastin e Navalnyt, ndërsa shtoi se Gjermania do të konsultohet me aleatët e NATO-s se si të përgjigjet, duke rritur shanset për një valë të re sanksionesh ndaj Rusisë.

Ndërkohë, Navalni vijon të ndodhet në terapi intensive në një spital të Berlinit, pasi transferimi i tij nga Rusia u realizua me nismë të bashkëpunëtorëve të tij. Laboratori ushtarak gjerman deklaroi pas analizave toksikologjike se ka prova të pakontestueshme se ai është helmuar me agjent nervor të llojit Novichok.