Arbitrazhi për rrugën Tiranë-Elbasan, PD: Shteti shqiptar do të paguajë 44mln euro

Një ditë pasi Partia Demokratike denoncoi humbjen e një gjyqi në Gjykatën e arbitrazhit, dhe se shteti shqiptar duhet t’i paguajë kompanisë greke AKTOR, 44 milionë euro, selia blu ka vijuar sërish akuzat për këtë çështje.

Ish-deputetja AlbanaVokshi ka publikuar faturat ku kompania “Inerte Express” në pronësi të Edmond Begos, ka përfituar 10 milionë euro si nënkontraktor për punimet në autostradën Tiranë-Elbasan. Sipas saj, Bego ka qenë i dënuar për trafik droge, dhe ligji shqiptar nuk e lejon që të përfitojë fonde publike.

“Trafikanti i drogës Edmond Bego e ka të ndaluar nga ligji i prokurimeve publike që të marrë pjesë në tenderë. Sipas ligjit asnjë i dënuar për trafik droge nuk mund të përfitojë para publike.  Por, kur një trafikant është mik i Taulant Ballës, ligji shkelet me të dyja këmbët nga qeveria e Edi Ramës, duke i bërë dhuratë atij 10 milionë euro”, tha deputetja Vokshi.

Më herët gjatë ditës së sotme ka reaguar edhe Ministria e Infrastrukturës dhe energjisë. Në një deklaratë të shpërndarë për mediat, ajo shprehet se ishte ky institucion që i ka denoncuar i pari aferat korruptive me kontratën e rrugës Tiranë Elbasan, të bëra nga drejtorët e Lëvizjes Socialiste për Integrim, në kohën kur kjo e fundit drejtonte këtë ministri.

“Me ndryshimin e drejtimit politik, Ministria e Infrastrukturës dhe Energjisë në shtator dhe tetor 2017 kërkoi realizimin e auditeve financiare në ARRSH për këto problematika. Auditet e realizuara nga MIE dhe MFE, gjatë dhjetorit të vitit 2017, shpallen si jo të ligjshme dhe në tejkalim të kompetencave amendimet e kontratave të realizuara nga ARRSH. Mbi bazë të këtyre gjetjeve u bënë edhe kallëzime në prokurori për drejtuesin e Njësisë së Menaxhimit të Projektit dhe ARRSH, ku nga ana e Prokurorisë u bënë edhe arrestimet përkatëse”, thuhet nw reagimin e Ministrisw sw Infrastrukturws.

Menjëherë pas këtyre akuzave ka reaguar edhe Lëvizja Socialiste për integrim. Duke publikuar një letër, që ish-ministri Haxhinasto i drejtonte Kryeministrit Rama në vitin 2016 lidhur me problematikat me kompaninë greke, LSI shprehet se përgjegjës për prishjen e kontratës janë zyrtarët socialistë, ish-ministri i financave Arben Ahmetaj dhe ish drejtori i ARSH-së Afrim Qendro.