‘Partia pa kryetar deri në zgjedhje’, Rudina Hajdari: Nuk jam pjesë e një partie që ka në qendër një individ

Sezoni i ri parlamentar do të sjellë në politiken shqiptare parti të reja, të cilat do të kandidojnë në zgjedhjet parlamentare të 25 prillit.

Rudina Hajdari kërkon një tjetër mandat, e për këtë së bashku me nismën “Thurje” po krijojnë një parti të re.

Në ndryshim nga partitë e tjera, Hajdari tregon se deri në zgjedhjet e ardhshme partia do të jetë pa kryetar.

“Në zgjedhjet e ardhshme ne të funksionojmë në mënyrë kolegjiale. Të jemi një grup. Në momentin që do kemi zgjedhje, qytetarët shqiptarë do vendosin nëpërmjet votave se kush do jetë kryetari i kësaj partie”, tha znj. Hajdari.

Deputetja që doli kundër urdhrit të kryedemokratit Lulzim Basha për të djegur mandatin sqaron përse nuk u bë pjesë e partisë që po krijon Myslym Murrizi.

“Nuk jam bërë pjesë, sepse më duket një parti e cila ka një individ në qendër të saj dhe për mua kjo nuk është një risi në treg, nuk është një risi për qytetarët. Është thjesht një minibiznes tjetër, i ri që po futet në treg”, u shpreh deputetja.

Pa përmendur emra konkret, Hajdari pohoi se edhe opozitarë të tjerë në parlament kanë shfaqur interes për t’u bërë pjesë e partisë së re.