Kryesimi i OSBE nga Shqipëria| Cakaj në Forumin Ekonomik dhe Mjedisor, promovohet roli i teknologjisë në luftën ndaj korrupsionit

Ministri në detyrë për Evropën dhe Punët e Jashtme, Gent Cakaj, mori pjesë në Takimin vjetor të Forumit Ekonomik dhe Mjedisor, që po zhvillohet në Pragë.

Përmes një postimi në faqen e vet në Facebook, ministri Cakaj bën me dije se në fokus të këtij takimi ishte rëndësia e përdorimit të teknologjive të reja dhe platformave digjitale në luftën kundër krimit të organizuar dhe korrupsionit.

“Promovimi i sigurisë, stabilitetit dhe zhvillimit ekonomik nëpërmjet luftës kundër korrupsionit është një prej prioriteteve themelore të Kryesisë Shqiptare të OSBE-së”, – shprehet ministri.

Ministri Cakaj tha më tej se mënyrat e ruajtjes së privatësisë dhe sigurisë kibernetike, lufta kundër mashtrimeve në sistemet financiare, shfrytëzimi i teknologjisë në shërbim të llogaridhënies publike e transparencës institucionale janë prej çështjeve kryesore në shtjellim e sipër prej ekspertëve të fushave dhe përfaqësuesve të lartë të vendeve pjesëmarrëse.

“Shqipëria si Kryesi e radhës e OSBE-së ndërkaq, është duke kryer detyrën e saj për nxitjen e bashkëpunimit mes vendeve pjesëmarrëse në funksion të përdorimit eficient të teknologjisë kundër korrupsionit”, – përfundoi z. Cakaj.

Ndërkohë, sot Departamenti Amerikan i Shtetit publikoi raportin për klimën e biznesit në Shqipëri, ku vendi ynë, për shkak të problemeve të vazhdueshme që mbeten siç janë korrupsioni, mungesa e transparencës apo garës në tenderë dhe sidomos mungesa e sundimit të ligjit, shihet si vend ku vështirë të bëhet biznes.

Lexoni gjithashtu:

Raporti i DASH, Shqipëria perceptohet si një ndër vendet më të korruptuara të Ballkanit Perëndimor